خطّة المفيش

قدّام عـينيـهـم..
قُرب رجـلـيهـم كده..
ندلدل لقمة العيش
من طرف نبّوت نابت من قفاهم
يحني الرّقاب
دايرة الكِعاب
تجري ورا جري الـلـُّعاب
يخبط النبّوت نافوخ
اللي كف كرامته يصفعه
ويدفعه إنّه يقيم راسه
أو يحاول يرفعه
أو يبطّل مسح جوخ...


اللي لُه لسان..
نقُصّه
واللي له ذراع..
 نِجِزُّه
واللي له دماغ..
نبيدُه
أو يتنَفَى
قبل ما يوعّي عبيدُه
ويسحب النبّوت م القفا


هنقضي ع الفقر
بإبادة الفُقرا
ننزع من الكِسوة الجيوب
ونسيب ثقوب
ونجمّع قُصاصات القماش
نصنع كفن
يتسابق أشباه البشر نحوه..
أصله ببلاش
وإن سُئِلنا: لماذا؟
نقول:
      "الجيب الخاوي ملوش عازة
       والتهوية وقاية من العفن
       والدعم مبتدأ الوطن"
ومابدِّهاش
هنزرع العطن
بدل الوطن
جوّا القلوب
ونجبر بذور البشر على الهروب


وبكده..
نراجع سريعاً سريعاً
مخ مفيش
ولا لقمة عيش
ولا جيب يشيل بقشيش
ومات المواطنون جميعاً
ونجحت خطة المفيش






نجحت خطة المفيش
وصبح مفيش مربوط ينضرب
ولا سايب يترعب
لذا كفا
ما عادش يهزّنا ضرب القفا
ولا يصدّنا واحد اتنفى


هنزيح حمام العمدة عن لحم بلدنا
ونكسي اللي انكشف منها بدم ولادنا
ونقولّها:
      "حقك علينا ياغندورة
       ضمّة حواجبك في الصورة
      كسرة عينيكي يا أسيرة
      اكمن يعني انتي يتيمة
      يسيطروا عليكي الغُـفَرا ! "
   
     شوف ياغفيري
    خُد شنباتك
    وسلاحك الميري
    واسنانك الصفرا
    وعينيك اللئيمة
    وخوِّف الكَفَرة
   
    وحلّ ياعُمدة عن سمانا
     ان حطّت عليك دبّانة
    مش عايزينها تطير حوالينا
    شيل حشراتك
    ولم مراتك
    وابلع مفتاح الزنزانة


    الغندورة صبحت حرّة
    ونطّت جريت برة الحُفرة
    وقامت ضمّت أهل الثورة
    وهتختار مين يحمي الفكرة
    ويبني لبكرة
    ويسيبها تقرر
    من بعد الفترة
    مين بعده هيقدر
   يشيل الأمانة

ريم متولي